«Чемпионат» интернет-нашри Россия чемпионатига ўтгач, трансфер қиймати ошиб кетган футболчилар рейтингини тузиб чиқди. Унга Ўзбекистон терма жамоаси сардори ва «Краснодар» клуби ярим ҳимоячиси Одил Аҳмедов ҳам киритилди, деб хабар бермоқда «Fut.uz».
Одил Аҳмедов Россия Премьер-лигасида ўйнагунига қадар трансфер қиймати 1,5 миллион евро бўлгани, ҳозирга келиб унинг нархи 9 миллион еврога айлангани таъкидланмоқда.
«Одил Аҳмедов каби меҳнаткаш ва бардошли футболчилар Осиёда юксак қадрланади. Шундай экан, Одил хитойлик футбол сармоядорлари эътиборига тушгани ажабланарли эмас. Аммо ‘Краснодар’ хўжайини Сергей Галицкий ярим ҳимоячини арзонга бериб юбормайди. Биринчидан, Галицкий учун пул муаммо эмас, керак бўлса унинг ўзи ‘Шандунънинг исталган футболчисини сотиб олиши мумкин.
Иккинчидан, Одил Аҳмедовнинг трансфер қиймати Россия чемпионатидаги фаолияти давомида анча ўсди. Бундай футболчи қўйиб юборилса, катта пул эвазига сотилиши турган гап. Бу ўринда гап пулда ҳам эмас, балки принсипда», – дейилади «Чемпионат»нинг мақоласида.
Аввалроқ Хитойнинг «Шандонг Луненг» клуби Одил Аҳмедовни 8 миллион еврога сотиб олишга яқин экани, ўзбекистонлик футболчи Пекинда тиббий кўрикдан ўтишни бошлагани ҳақида хабар берилганди. Кейинроқ 29 ёшли футболчи Хитойга бормагани ва у тўғилиб ўсган Наманган шаҳрида бўлгани маълум қилинди.
Маълумот учун, Одил Аҳмедов 2006–2011 йиллар давомида Тошкентнинг «Пахтакор» клуби шарафини ҳимоя қилган. Шундан сўнг у Россия чемпионатига йўл олди ва 2011–2014 йилларда у Махачқалъанинг «Анжи» жамоасида тўп сурди. 2014 йилда бугунги кунга қадар эса Аҳмедов «Краснодар» аъзоси ҳисобланади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)