“Chempionat” internet-nashri Rossiya chempionatiga o‘tgach, transfer qiymati oshib ketgan futbolchilar reytingini tuzib chiqdi. Unga O‘zbekiston terma jamoasi sardori va “Krasnodar” klubi yarim himoyachisi Odil Ahmedov ham kiritildi, deb xabar bermoqda “Fut.uz”.
Odil Ahmedov Rossiya Premyer-ligasida o‘ynaguniga qadar transfer qiymati 1,5 million yevro bo‘lgani, hozirga kelib uning narxi 9 million yevroga aylangani ta’kidlanmoqda.
“Odil Ahmedov kabi mehnatkash va bardoshli futbolchilar Osiyoda yuksak qadrlanadi. Shunday ekan, Odil xitoylik futbol sarmoyadorlari e’tiboriga tushgani ajablanarli emas. Ammo ‘Krasnodar’ xo‘jayini Sergey Galitskiy yarim himoyachini arzonga berib yubormaydi. Birinchidan, Galitskiy uchun pul muammo emas, kerak bo‘lsa uning o‘zi ‘Shandun’ning istalgan futbolchisini sotib olishi mumkin.
Ikkinchidan, Odil Ahmedovning transfer qiymati Rossiya chempionatidagi faoliyati davomida ancha o‘sdi. Bunday futbolchi qo‘yib yuborilsa, katta pul evaziga sotilishi turgan gap. Bu o‘rinda gap pulda ham emas, balki prinsipda”, – deyiladi “Chempionat”ning maqolasida.
Avvalroq Xitoyning “Shandong Luneng” klubi Odil Ahmedovni 8 million yevroga sotib olishga yaqin ekani, o‘zbekistonlik futbolchi Pekinda tibbiy ko‘rikdan o‘tishni boshlagani haqida xabar berilgandi. Keyinroq 29 yoshli futbolchi Xitoyga bormagani va u to‘g‘ilib o‘sgan Namangan shahrida bo‘lgani ma’lum qilindi.
Ma’lumot uchun, Odil Ahmedov 2006–2011-yillar davomida Toshkentning “Paxtakor” klubi sharafini himoya qilgan. Shundan so‘ng u Rossiya chempionatiga yo‘l oldi va 2011–2014-yillarda u Maxachqal’aning “Anji” jamoasida to‘p surdi. 2014-yilda bugungi kunga qadar esa Ahmedov “Krasnodar” a’zosi hisoblanadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)