Россиялик оғир вазнли боксчи Александр Поветкиндан допинг — тақиқланган остарин моддаси топилди. Бу ҳақда у канадалик Бермейн Стивернга қарши жангни бошлашига бир соат қолганида маълум бўлди — мазкур жанг WBC йўналиши бўйича муваққат чемпионни аниқлаб бериши лозим эди. Допинг ҳақидаги янгиликдан сўнг, Стиверннинг жамоаси жанг ўтказилмаслигини маълум қилди. Поветкин дисквалификация қилиниши ва спортчилик фаолиятини эрта якунлаши мумкин, деб ёзади Meduza.
Поветкин — россиялик энг машҳур оғир вазнли боксчи. Афина—2004 Олимпиадасидаги ғалабадан сўнг, Поветкин профессионал боксга ўтган. 2011 йили у WBA йўналиши бўйича чемпионга айланган. 2013 йили фаолиятидаги ҳозирча ягона мағлубиятни тан олган ва мазкур йўналиш бўйича мутлақ чемпионлик камарини қўлга кирита олмаган — Поветкин очколар бўйича украиналик Владимир Кличкога имкониятни бой берган эди.
17 декабрь куни Поветкин WBC йўналиши бўйича муваққат чемпионлик камари учун жанг ўтказиши лозим эди. Россиялик боксчига канадалик Бермейн Стиверн рақиб эди. Мазкур тўқнашувда ғалаба қозонса, Поветкин асосий соврин учун америкалик Деонтей Уайлдерга қарши рингга кўтарилиш ҳуқуқига эга бўларди.
Жангга озгина вақт қолганида, Поветкиндан допинг топилгани маълум бўлди. Бу ҳақда Жаҳон бокс кенгаши (WBC) раҳбари Маурисио Сулаймон Twitter’даги саҳифасида ёзди. Поветкиннинг намуналарида бодибилдерлар орасида оммабоп бўлган тақиқланган модда — остарин топилган. Стиверннинг жамоаси шу заҳоти жангдан воз кечди. Бироқ Поветкин 17 декабрь куни барибир рингга чиқиши кутилмоқда. Промоутерлар унга рақиб топиб бўлган — франциялик оғир вазнли боксчи Жоан Дюоп. Бу жангда ҳеч қандай соврин ўйналмайди.
Поветкин бу йил бир марта допинг билан қўлга тушган эди. 2016 йил 13 май куни боксчининг намуналаридан мельдоний моддаси топилган эди. Шу сабабли йилнинг энг кутилган жанги — Поветкиннинг америкалик Деонтей Уайлдер билан тўқнашув йўққа чиққан. Россиялик спортчининг вакиллари Поветкин ҳақиқатан ҳам бу дори воситасини қабул қилгани, бироқ мельдоний тақиқланган моддалар рўйхатига киритилишидан бир неча ой аввал бу препаратдан фойдаланишни тўхтатганини билдирган эди. Ўшанда боксчини дисквалификация қилмаслик қарорига келинган, бироқ унинг Уайлдер билан жанги бекор қилинган эди.
Поветкиннинг промоутерлари «америкалик ҳамкорлар провокация қилаётгани» ҳақида гапирмоқда. «Биз Халқаро антидопинг агентлиги томонидан ва ‘америкалик ҳамкорларимиз’ томонидан турли провокациялар бўлишини, мана шундай вазият юзага келишини кутгандик», — дея изоҳ берди промоутер Алексей Титов Знак нашрига берган интервьюсида. Унинг сўзларига кўра, шу сабабли ҳам жамоа аввалдан — ҳар эҳтимолга қарши — франциялик боксчи билан шартнома имзолаб қўйган бўлган.
Поветкин дисквалификация қилиниши эҳтимоли катта. Унинг кейинги фаолияти сўроқ остида. Мельдоний билан боғлиқ воқеадан сўнг, Жаҳон бокс кенгаши Поветкинни кейинги бир йил давомида намуналарида яна допинг топилса, жазо чоралари кўрилиши ҳақида огоҳлантирган эди. Агар қўшимча текширувлар Поветкин ҳақиқатан ҳам допинг қабул қилганини тасдиқласа, боксчи дисквалификация қилинади. Эксперт Александр Беленкийнинг айтишича, бу 37 ёшли спортчи учун фаолият интиҳоси, дегандек гап.
Ушбу допинг можароси россиялик олимпиячиларнинг допинг можароси билан боғлиқ эмас. Жаҳон бокс кенгаши — профессионал ташкилот бўлиб, унда допингга нисбатан ҳаваскор спортдагидан бошқачароқ қоидалар амал қилади. Поветкин — Стиверн жанги олдидан ташкил этилган текширув Кўнгилли равишда допингга текшириш ассоциацияси (VADA) томонидан ўтказилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)