Самарқандда 23 декабрь, жума куни халқ депутатлари вилоят кенгашининг навбатдан ташқари сессияси бўлиб ўтди. Сессияда Ўзбекистон Республикаси Президенти Шавкат Мирзиёев иштирок этди ва сўзга чиқди. Бу ҳақда давлат раҳбарининг матбуот хизмати хабар бермоқда.
Маърузада қадим Самарқанд ва самарқандликларнинг салоҳияти, яратувчиликка иштиёқи азалдан баланд бўлиб келгани, шаҳар ва туманлар марказлари, қишлоқларнинг бугунги қиёфаси ўзгариб, дунё эътиборини ўзига тортаётгани таъкидланди.
Шу билан бир қаторда, вилоят саноат салоҳиятини янада ошириш учун туман ва шаҳарларда ҳали ишга солинмаган имкониятлар кўплиги қайд этилди.
Сессияда ташкилий масала кўрилди. Ўзбекистон Республикаси Президенти Шавкат Мирзиёев тавсиясига биноан Самарқанд вилояти ҳокимининг биринчи ўринбосари лавозимида ишлаб келаётган Ҳиммат Оқбўтаев Самарқанд вилояти ҳокими этиб сайланди.
Эслатиб ўтамиз, олдинроқ вилоятнинг собиқ ҳокими Зойир Мирзаев Ўзбекистон бош вазирининг ўринбосари — қишлоқ ва сув хўжалиги вазири этиб тайинлангани маълум қилинганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)