Ўзбекистон Республикасининг «Пиротехника буюмлари муомаласи тартибга солиниши муносабати билан Ўзбекистон Республикасининг айрим қонун ҳужжатларига қўшимчалар киритиш тўғрисида»ги Қонуни фуқаролар манфаатларини ҳимоя қилиш, хусусан, уларнинг саломатликлари ва жамоат хавфсизлигини таъминлашда муҳим асос бўлиб хизмат қилмоқда. Мазкур қонунга мувофиқ пиротехника буюмлари муомаласини лицензиялаш жорий этилган. Бу ҳақда Тошкент шаҳар божхона бошқармаси ахборот хизмати хабар бермоқда.
Пиротехника буюмларининг ноқонуний муомаласи юзасидан маъмурий ва жиноий жавобгарликнинг кучайтирилиши божхона органларининг ҳам масъулиятини янада оширди.
Жумладан, Тошкент шаҳар божхона бошқармасининг «Келес» темир йўл чегара божхона пости ходимлари «Москва—Тошкент» йўловчи поездида Ўзбекистонга кириб келган фуқаро Ф.Аҳмедовнинг (исм-шарифлар ўзгартирилган) қўл юкларини божхона кўригидан ўтказганда, йўловчи божхона декларациясида кўрсатилмаган ва оғзаки сўровда айтилмаган 72 дона «Супер Жук» пиротехника воситасини шоколад қутисида яширинча олиб келаётгани маълум бўлди.
Шунингдек, бошқарма тезкор гуруҳи ходимлари томонидан бошқа ҳуқуқни муҳофаза қилувчи идоралар вакиллари билан ҳамкорликда ўтказилган тадбирда Тошкент шаҳрининг Олмазор туманида пиротехника воситаларни сотиш ва тарқатиш билан шуғулланаётган фуқаролар А.Содиқов ва А.Саидовдан жами 19 200 дона «С рождеством» номли пиротехника воситаси ашёвий далил сифатида олиб қўйилди.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Изоҳ (0)