Элчига ўлим йўқми? 2003–2015 йилларда дунё миқёсида элчиларга уюштирилган суиқасдлар

19 декабрь куни Анқара Замонавий санъатлар марказида расмлар кўргазмасининг очилиш маросимида Россиянинг Туркиядаги элчиси Андрей Карлов чиқиш қилаётган пайтда номаълум шахс томонидан отиб ташланди. Жиноятчи араб ва турк тилларида гапириб, ўз мотивларини тушунтиришга уринди, шунингдек, тепага қарата ўқ узиб, залда тўпланганларни бинони тарк этишга чақирди.

Воқеа жойига етиб келган турк полицияси махсус кучлари узоқ давом этган отишмадан сўнг экстремистни йўқ қилди. Аммо элчининг жонини сақлаб қолишнинг имкони бўлмади. Андрей Карлов ҳаётдан кўз юмди.

Ушбу воқеа жаҳон миқёсида кенг муҳокамаларни келтириб чиқарди. Турли таҳлиллар ва баҳслар қаторида баъзи нашрлар масаланинг тарихини ҳам ўрганишга уринмоқда. Шу муносабат билан «РИА Новости» 2003 йилдан бугунга қадар турли мамлакатларда элчиларга нисбатан уюштирилган ҳужумларни эсга олди.

2003

28 март куни Кот-д’Ивуар пойтахти Абужада Саудия Арабистони элчиси Муҳаммад Аҳмад Рашид ўлдирилди.

29 декабрь куни Бурундида Папа нунцийси (Ватикан элчиси), ирландиялик Майкл Кортни оғир яраланди. Нунцийга ҳужум мамлакат пойтахти Бужумбурадан 40 километр жануброқда рўй берди.

Нунций маҳаллий шифохонада операция чоғида кўп қон йўқотишдан вафот этди.

2005

2 июль куни Мисрнинг Ироқдаги элчиси Ихоб аш-Шариф Бағдоддаги уйидан олиб қочиб кетилди. Унинг қўлга олиниши учун жавобгарликни Мусоб аз-Зарқавийнинг «Икки дарё оралиғи ўлкасидаги жиҳод базаси» ташкилоти ўз зиммасига олди. 7 июль куни террорчилар асир қатл этилганини эълон қилди, аммо унинг танаси шу билан топилмади.

21 июль куни Бағдодда Жазоир дипломатик миссияси раҳбари Али Билъаруссий пресс-атташе Изиддин Белқадий билан бирга ўғирлаб кетилди. 27 июль куни улар қатл этилгани маълум бўлди. Жавобгарликни яна ўша гуруҳ зиммасига олди.

2008

20 сентябрь куни Покистон пойтахти Исломободда «Мариотт» меҳмонхонасида уюштирилган портлашда Чехия элчиси Иво Ждярек ҳалок бўлди. 2008 йил августда вазифасига киришган элчи шаҳарнинг энг нуфузли ва яхши қўриқланадиган меҳмонхонаси ҳисобланадиган «Мариотт»да турарди.

Жавобгарликни Fedayeen Islam гуруҳи зиммасига олди. Ҳужум оқибатида 53 киши ҳалок бўлди, 226 киши яраланди.

2012

11 сентябрь куни Ливияда дипломатик идорага уюштирилган ҳужум оқибатида АҚШнинг мамлакатдаги элчиси Кристофер Стивен ва Бенгазидаги АҚШ консуллигининг уч ходими ўлдирилди. АҚШ консуллиги биноси номаълум шахслар томонидан гранатомётлардан ўққа тутилди.

2015

27 март куни Сомали пойтахти Могадишодаги меҳмонхонага «аш-Шабоб» гуруҳи уюштирган ҳужум оқибатида 24 киши ҳалок бўлди. Улар орасида Сомалининг Швейцариядаги элчиси ҳам бор эди.