Россия президенти Владимир Путин Япония ОАВларига интервью чоғида 2012 йили унга совға қилинган акита зотига мансуб Юмэ лақабли итни кўрсатди. Бу ҳақда TJournal хабар бермоқда.
«Менга сизлар Юмэни кўрмоқчи эканлигингизни айтишди. Марҳамат, унга бемалол кўз ташлашингиз мумкин. Юмэ — жиддий ит. Одам кўп, камералар, фотоаппаратлар, ёритгичлар ишлаб турибди. Лекин у бемалол ўзининг қўриқчилик вазифасини бажаряпти», — дея таъкидлади Путин.
2012 йилда Акита префектураси вакиллари Россия томонига Путинга совға сифатида Юмэ («Орзу») лақабли кучукни топширганди. Япония шу тариқа Россия 2011 йил мартида зилзила ва цунамидан азият чеккан минтақаларга берган ёрдам учун миннатдорлигини билдирган.
Эслатиб ўтамиз, 15—16 декабрь кунлари Россия президентининг Японияга ташрифи режалаштирилган.
Изоҳ (0)