Адабиёт бўйича Нобель мукофотига муносиб кўрилган америкалик рок ижрочиси Боб Дилан мукофотни топшириш маросими учун нутқ тайёрлади ва уни мукофот ташкилотчиларига тақдим этди. Ушбу нутқда Дилан бундай мукофотга лойиқ кўрилгани учун миннатдорлик сўзларини изҳор этган, деб ёзади «ТАСС».
Мусиқачининг ўзи Стокгольмга бормаслиги сабабли, унинг нутқи 10 декабрь куни мукофотни топшириш маросимидан кейин бўлиб ўтадиган банкетда Швеция академияси собиқ доимий котиби Хорас Энгдал томонидан ўқиб эшиттирилади.
Нобель фондининг ижрочи директори Ларс Хайкенстеннинг айтишича, айни пайтда филармония саҳнасида Карл XVI Густав қўлидан мукофотни — диплом ва олтин медални Диланнинг ўрнига кимдир қабул қилиб олиш-олмаслиги номаълум.
Эслатиб ўтамиз, Боб Дилан «Америка қўшиқчилик анъанаси доирасида янги поэтик ибораларни яратгани учун» мукофотга лойиқ деб топилган эди. Аммо Дилан уни олиш учун Стокгольмга боришдан бош тортди.
Изоҳ (0)