«Ниҳол» давлат мукофоти совриндори, турли нуфузли халқаро танловлар ғолиби Элеонора Қутлибулатова таниқли композиторлар асарларини ижро этиб, мумтоз мусиқа шинавандаларини хурсанд қилишда давом этмоқда, деб ёзади «Культура.уз».
Сўнгги пайтларда Элеонора турмуш ўртоғи, таниқли пианиночи Улуғбек Полвонов ва тўрт ёшли қизи Софи Марлен билан биргаликда Германияда истиқомат қилмоқда. 2014 йилда у Германиядаги етакчи олийгоҳлардан бири — Росток шаҳридаги Мусиқа ва театр олий мактабини аъло баҳолар билан тугатди.
Элеоноранинг концертлари нафақат Германияда, балки Европанинг бошқа шаҳарларида ҳам муваффақият билан ўтади, шу туфайли, унинг гастроль графиги жуда тиғиз.
«Ноябрь ўртасида ‘Классик’ лойиҳаси доирасида Виттен шаҳрида симфоник оркестр билан концерт ўтказдик. Чипталар бир ҳафта олдин сотилиб кетди, 800 кишилик зал одамга лиқ тўлди», — деди пианиночи.
Яқиндан бошлаб Элеонора Европада таниқли гитарачи Евгений Беленинов билан жуфтликда концерт бермоқда. Уларнинг дуэти Belle деб ном олди. Bild.de, Berliner Morgenpost, Markische Oderzeitung, Morgenpost Dresden каби нуфузли нашрлар ушбу дуэт ижодига юқори баҳо берди.
Изоҳ (0)