Prezident sayloviga tayyorgarlik ko‘rish va uni o‘tkazish jarayonini kuzatish uchun O‘zbekistonga kelgan xorijiy davlatlar va xalqaro tashkilotlar vakillari joylarda tashkil etilayotgan uchrashuvlar doirasida Oliy Majlis Qonunchilik palatasiga tashrif buyurdi. Bu haqda palata matbuot xizmati xabar bermoqda.
Qonunchilik palatasi Xalqaro ishlar va parlamentlararo aloqalar qo‘mitasi a’zolari Z. Umarov va F. Eshmatovaning Qozog‘iston Respublikasi Parlamenti Majlisi (quyi palata) deputatlari F. Karatayev va K. Yerjan bilan muloqoti bo‘lib o‘tdi.
— Prezident saylovi va unga tayyorgarlik jarayoni haqida OAV orqali batafsil ma’lumot oldik. Prezidentlikka partiyalardan ko‘rsatilgan nomzodlarning chiqishlarini kuzatib, ular bir-birlari va saylovchilarni hurmat qilishlariga guvoh bo‘ldim. Ushbu saylovga odamlar mas’uliyat bilan qarashmoqda, — deydi Kudaybergen Yerjan.
Qayd etishim joizki, O‘zbekiston men tug‘ilgan joy va bu menga mamnuniyat bag‘ishlaydi. Bu yerda eng yaqin do‘stlarim bor. Ular bilan ko‘rishish men uchun yoqimli. Biz avvalroq Qozog‘istondagi O‘zbekiston elchixonasida bo‘ldik. U yerda ham saylovga tayyorgarlik yuksak darajada tashkil etilgan. Umuman, xorijda yashayotgan fuqarolarga mazkur saylovda erkin ishtirok etish va ovoz berishlari uchun barcha sharoitlar yaratilgan.
Bu, o‘z navbatida, fuqarolarning o‘z burchlarini amalga oshirish, konstitutsiyaviy huquqlarini ro‘yobga chiqarishlari uchun muhim ahamiyatga ega. Zero, bu kunda o‘zbek xalqi mamlakat kelajagi uchun ovoz beradi.
Saylovda kuzatuvchi sifatida ishtirok etayotgan davlatlar ro‘yxatini ko‘rib amin bo‘ldimki, ushbu muhim siyosiy tadbirda ko‘plab xorij mamlakatlari va xalqaro tashkilotlardan kuzatuvchilar ishtirok etmoqda. Bu saylovning ochiqlik va oshkoralik, umume’tirof etilgan demokratik tamoyillarga muvofiq o‘tkazilishidan dalolat beradi. Negaki, dunyoda O‘zbekistonga beriladigan baho juda ham yuqori. Shunday ekan, xalqingizga munosib nomzod tanlashda omad tilayman.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)