Фидель Кастронинг Майами (АҚШнинг Флорида штати)да яшовчи синглиси Хуанита Кастро Кубага акасининг дафн маросимига бормайди. Бу ҳақда у 26 ноябрь, шанба куни Майамида испан тилида чиқадиган газетага маълум қилди, деб ёзади «ТАСС».
«Менинг дафн маросимида қатнашиш учун Кубага жўнаб кетганим ҳақидаги нотўғри миш-мишлар туфайли, мен ҳеч қачон оролга қайтмаганимни ва бундай режам ҳам йўқлигини маълум қилмоқчиман», — деди Хуанита Кастро.
Шу билан бирга, у мафкуравий зиддиятга қарамай, акасининг ўлимини ғам-қайғу билан қабул қилганини айтди. Хуанита Кастро акасининг ўлимидан кейин кубаликлар «пировардида бутун халқни бирлаштирадиган йўлни топиши»га умид билдирди.
Хуанита 1964 йилда Кубадан Майамига қувиб юборилгач, кўп бора Куба ҳукуматига қарши танқидлар билан омма олдида чиқиш қилган. Кейинроқ у 1961 йилдан АҚШ Марказий разведка қўмитаси билан ҳамкорлик қилганини тан олди.
Эслатиб ўтамиз, Куба инқилоби етакчиси сифатида танилган Фидель Кастро 90 ёшида оламдан кўз юмди.
Изоҳ (0)