Ўзбекистонлик боксчи Ботиршер Обидов Ковалёв ва Уорд жанги кечасида рингга чиқади

Лас-Вегасда (АҚШ, Невада штати) 19 ноябрь, шанба куни йирик бокс кечаси бўлиб ўтади. Унинг доирасида ярим оғир вазнда WBA (Super), WBO ва IBF версиялари бўйича жаҳон чемпиони, 33 ёшли россиялик Сергей Ковалёв Super Six турнири ғолиби ва иккинчи ўрта вазн собиқ етакчиси 32 ёшли америкалик Андре Уорд билан жанг қилади. Бу ҳақда «Газета.uz» хабар бермоқда.

Ушбу марказий беллашувдан ташқари, кеча ташкилотчилари яна тўққиз беллашувга тайёргарлик кўрмоқда. Жумладан, ўзбекистонлик 24 ёшли Ботиршер Обидов 23 ёшли россиялик Баҳром Муртазалиевга қарши саккиз раундлик жангга чиқади.

Андижонлик боксчи профессионал боксдаги фаолиятини ўтган йил февралида бошлаган. Бу вақт давомида у АҚШда етти учрашув ўтказиб, уларнинг олтитасида ғалаба (иккита нокаут) ва бир дурангга эришди.

Турнир T-Mobile Arena’да ўтказилади, трансляция эса Pay-Per-View тизими бўйича HBO телеканали орқали амалга оширилади. Шоу Россиянинг Биринчи канали орқали 20 ноябрь, якшанба куни Тошкент вақти билан 9:50 да тўғридан-тўғри эфирда олиб берилади.