Малайзиялик ўт ўчирувчи Абу Зарин Ҳуссин газеталарда у ҳақда ёзилган уйдирма хабарлар туфайли бутун дунёга машҳур бўлганлигини билиб, жуда ҳайрон қолди. Британия таблоидлари 31 ёшли эркак уч метрлик илонга уйлангани ҳақида тарқатган хабарларни эркак тасдиқламади, деб хабар беради «ТАСС».
Daily Mirror ва Daily Mail нашрлари ижтимоий тармоқларда эркакнинг илон билан бирга тушган суратларини териб олиб, у судралувчига уйлангани ҳақида хабарлар тарқатган эди. Гўёки эркак капча илонни марҳум дугонасининг қайта туғилиши деб ҳисоблаб, унга уйланган экан.
Абу Зарин ушбу мақолалар остида ўз суратларини кўриб ғазабланди.
«Бу менинг суратларим, лекин баён этилган воқеа тўлалигича уйдирмадир», — таъкидлади эркак.
Абу Зарин қутқарув хизматида ўт ўчирувчилар инструктори сифатида ишлайди, Малайзияда эса кўпинча уйга кириб олган илонларни зарарсизлантириш учун ўт ўчирувчилар чақирилади.
Абу Зариннинг отаси илон авровчи бўлган, шу боис йигитда, дастлабки пайтларда илонлардан қўрққанига қарамай, аста-секин илонлар билан тил топишиш қобилияти аниқланди.
Йигитнинг уйида тўртта илон яшайди. Уларнинг барини ўт ўчирувчи хизмат пайти тутиб олган. Абу Зарин жониворларнинг феъл-атворини ўрганиб, сўнг қўйиб юборади.
Изоҳ (0)