Россия иқтисодий ривожланиш вазири Алексей Улюкаевнинг ҳибсга олиниши мамлакат ҳукуматининг истеъфоси учун етарли асос бўла олмайди. Бу ҳақда Кремль расмий вакили Дмитрий Песков баёнот берди, деб хабар беради «Интерфакс».
Журналистларнинг бу ҳақдаги саволига жавоб бераркан, Песков бу икки масала алоқадор эмаслигини маълум қилди.
«Алоқа кўрмаяпман. Гап шахсий айбловлар ҳақида кетмоқда, улар эса у ёки бу вазирнинг ёхуд шунчаки жисмоний шахснинг айбдор ёки коррупционер деб тан олиниши учун асос бўла олмайди», — таъкидлади у.
Шунингдек, Песков мамлакат президенти Владимир Путин Улюкаевни ишдан бўшатиш қарорини қабул қилгани ҳақидаги гапларни тасдиқламади.
Бир муддат олдин Россия тергов қўмитаси Улюкаевга нисбатан айблов илгари сурган эди. У 15 йилга қамалиши мумкинлиги айтилмоқда.
Изоҳ (0)