Ўзбекистон Республикаси Марказий сайлов комиссиясининг навбатдаги мажлиси бўлиб ўтди. Комиссия раиси М. Абдусаломов бошқарган мажлисда сиёсий партиялар вакиллари, ЕХҲТ Демократик институтлар ва инсон ҳуқуқлари бўйича бюроси сайловни кузатиш миссияси аъзолари, шунингдек, ОАВ ходимлари иштирок этди. Бу ҳақда Ўзбекистон Республикаси Президенти сайловини ёритиш бўйича Республика матбуот маркази маълум қилди.
Марказий сайлов комиссияси кўзи ожиз фуқароларнинг сайлов ҳуқуқларини таъминлаш, улар учун Брайл алифбосида сайлов бюллетенларини тайёрлаш бўйича қўшимча чора-тадбирларни қабул қилди.
Тадбирда қайд этилганидек, жамиятни янада янгилаш ва демократлаштириш фуқароларнинг сайлов ҳуқуқларини таъминлаш билан узвий боғлиқдир. Миллий сайлов тизими, «Ўзбекистон Республикаси Президенти сайлови тўғрисида»ги Қонун, унга сўнгги йилларда киритилган ўзгартиш ва қўшимчалар, шунингдек, сайловчиларнинг қонунларда мустаҳкамлаб қўйилган ҳуқуқ ва эркинликларини кенг тушунтириш ишлари олиб бориляпти. Тадбирлар аҳолининг кенг қатлами, хусусан, хотин-қизлар, ёшлар, айниқса, биринчи марта овоз берадиган йигит-қизлар, нуронийлар, жисмоний имконияти чекланган шахслар, ҳарбий хизматчилар, фуқаролар йиғинлари вакиллари, меҳнат жамоаларида, ўқув муассасаларида, шунингдек, хорижда олиб бориляпти.
Сайлов кампаниясида халқаро кузатувчиларнинг иштирок этиши сайлов жараёнининг очиқлиги ва ошкоралигини мустаҳкамлашга хизмат қилади. Маълумки, ЕХҲТ Демократик институтлар ва инсон ҳуқуқлари бўйича бюроси кузатувчилар миссиясининг элчи Йохан Петер Трауготт Тейлер бошчилигидаги асосий гуруҳи сайлов жараёнини кузатиш бўйича ўз фаолиятини давом эттирмоқда.
Мажлисда ЕХҲТ Демократик институтлар ва инсон ҳуқуқлари бўйича бюроси кузатувчилар миссиясининг мамлакатга шу йилнинг 6—7 ноябрь кунлари ташриф буюрган 20 нафар узоқ муддатли кузатувчиларини аккредитация қилиш тўғрисида қарор қабул қилинди.
Изоҳ (0)