Исландия ҳукумати 30 октябрь, якшанба куни бир кун аввалги альтинг (парламент) сайловларида парламентдаги кўпчилик ўринни йўқотгач, расман истеъфо берди, деб ёзади «ТАСС» Исландия давлат теле- ва радиоузатиш хизматига таяниб.
Мамлакат бош вазири ва Тараққиёт партияси раиси Сигурдур Инги Йоханссон ўз ваколатларидан воз кечиб, ҳукумат ваколатини Исландия президенти Гудни Йоханессонга топширди. Президент бош вазир истеъфосини қабул қилди ва ҳукумат янги ҳукмрон коалиция таркиби аниқлаштирилгунга қадар ҳокимият тепасида қолишини эълон қилди.
Мамлакат парламентига еттита партия ўтган бўлиб, айни пайтда янги ҳукмрон коалиция таркиби аниқ эмас. Ҳукуматни шакллантириш ҳуқуқини сўраб давлат раҳбарига ҳозирча иккита партия мурожаат қилди, булар — сайловда энг кўп (29%) овоз тўплаган Мустақиллик партияси, шунингдек, шу йилнинг майида ташкил қилинган «Тикланиш» партияси (10,5%). Президент ўз қарорини қачон эълон қилиши ҳозирча аниқ эмас.
Изоҳ (0)