Саудия Арабистонида ИШИДга алоқадор террорчилик гуруҳи фаолияти фош этилди

Саудия Арабистонида ИШИДга алоқадор террорчилик гуруҳи фаолияти фош этилди. Бу ҳақда «ТАСС» хабар бермоқда.

Саудия Арабистони Ички ишлар вазирлиги ахборотига кўра, гуруҳ тўрт киши – икки покистонлик, бир суриялик ва бир суданликдан ташкил топган.

Гумонланувчилар хавфсизлик хизмати ходимлари ва тинч аҳоли вакилларига қарши қаратилган ҳужумлар уюштиришни режалаштирган бўлган.

Бундан ташқари, улар Саудия Арабистони ва БАА футбол терма жамоалари ўртасидаги ўйин вақтида Жиддадаги Қирол Абдуллоҳ стадионига ҳам ҳужум қилмоқчи бўлган.

Бироқ Саудия хавфсизлик кучлари мазкур ҳужумларнинг барчасини олдини олишга муваффақ бўлиб, террорчилик гуруҳини фош этган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.