Islandiya hukumati 30-oktabr, yakshanba kuni bir kun avvalgi alting (parlament) saylovlarida parlamentdagi ko‘pchilik o‘rinni yo‘qotgach, rasman iste’fo berdi, deb yozadi “TASS” Islandiya davlat tele- va radiouzatish xizmatiga tayanib.
Mamlakat bosh vaziri va Taraqqiyot partiyasi raisi Sigurdur Ingi Yoxansson o‘z vakolatlaridan voz kechib, hukumat vakolatini Islandiya prezidenti Gudni Yoxanessonga topshirdi. Prezident bosh vazir iste’fosini qabul qildi va hukumat yangi hukmron koalitsiya tarkibi aniqlashtirilgunga qadar hokimiyat tepasida qolishini e’lon qildi.
Mamlakat parlamentiga yettita partiya o‘tgan bo‘lib, ayni paytda yangi hukmron koalitsiya tarkibi aniq emas. Hukumatni shakllantirish huquqini so‘rab davlat rahbariga hozircha ikkita partiya murojaat qildi, bular — saylovda eng ko‘p (29%) ovoz to‘plagan Mustaqillik partiyasi, shuningdek, shu yilning mayida tashkil qilingan “Tiklanish” partiyasi (10,5%). Prezident o‘z qarorini qachon e’lon qilishi hozircha aniq emas.
Izoh (0)