Молдова 30 октябрь, якшанба куни 20 йиллик танаффусдан сўнг биринчи марта умумхалқ овоз бериши йўли билан президентни сайламоқда. Бу ҳақда «ТАСС» хабар берди.
Охирги бор давлат раҳбари шу тариқа 1996 йили сайланган, 2000 йилдан бери эса бу ваколат парламентга берилганди. Бироқ жорий йил мартида Конституциявий суд бу меъёрни ноқонуний деб топди ва тўғридан-тўғри сайловни тиклади.
Амалдаги давлат раҳбари, 68 ёшли Николай Тимофти иккинчи муддатга номзодини қўйишдан бош тортди. Сайловларда иштирок этаётган 9 номзод орасида Россия билан яқинлашиш тарафдори бўлган Социалистлар партияси вакили Игорь Додон ва Европа сари интилаётган мухолифат номзоди, «Ҳаракат ва бирдамлик» партияси раҳбари Майя Санду яққол етакчилик қилмоқда. Маҳаллий ОАВ Америкада таҳсил олган ва Жаҳон банкида хизмат қилган Санду АҚШ томонидан қўллаб-қувватланаётганини билдирмоқда.
Изоҳ (0)