Инновацион контрабанда: Украиналик фуқаро Венгрияга «тамаки етказиш» учун дрондан фойдаланди

Украина чегарачилари учувчисиз учар қурилмадан фойдаланган ҳолда сигаретлар контрабандаси билан шуғулланган шахсни қўлга олди, дея хабар бермоқда TJournal.

Ҳодиса Венгрия билан чегарада юз берган. Осмонда дронни кўрган чегарачилар унинг эгасини қидиришга тушган. Кўп ўтмай олти парракли квадрокоптер ҳам, унинг эгаси ҳам топилган ва қўлга олинган.

Тинтув вақтида гумонланувчининг ёнидан Украинада ишлаб чиқарилган 16 блок сигарет топилган. Худди шунча тамаки дронга ҳам маҳкамланган бўлган. Шундан келиб чиқиб, чегарачилар дрон эгасини Венгрияга тамаки ўтказишга уринганликда гумон қилмоқда.

Аввалроқ Украина чегара хизмати вакили Олег Слободян сигаретлар Украинадан Европа Иттифоқига контрабанда йўли билан олиб ўтилаётган энг асосий маҳсулот эканини маълум қилган эди. Жумладан, 2015 йили Венгрия, Руминия, Польша ва Словакия билан чегарада 2,5 миллион қути тамаки маҳсулоти ушлаб қолинган, бу 2014 йилги кўрсаткичдан бир ярим баробар кўп.

Тамакини айланмалар йўллар билан ўтказишда фақат дронлардан фойдаланилмайди. Октябрь ойи бошида россиялик фуқаро сигарет пачкалари яширинган қутини Литвага ўтказиш учун Неман дарёсини сузиб ўтган эди.