Таиланд ҳукумати қирол Пхумипон Адулядетнинг вафоти муносабати билан эълон қилинган умуммиллий мотам сабаб мамлакатда қора рангли либос тақчиллиги юзага келганидан огоҳлантирди. Бу ҳақда The Guardian нашри хабар бермоқда.
Таиланд савдо вазирлиги мотам либосларини барқарор равишда етказиб бериш бўйича ишлаб чиқарувчилар ва етказиб берувчилар билан фаол иш олиб бораётганини маълум қилган.
Вазирликнинг ички савдо бўйича бош директори Нунтаван Сакунтанага ишлаб чиқарувчилар ҳозирча ҳаддан ташқари катта талабни қондира олмаётгани билдириб, истеъмолчилардан мотам либосларини сотиб олишни бироз кейинроққа қолдиришни сўраган.
Хабар беришларича, қиролнинг ўлимидан сўнг мамлакатда қора рангли кийим нархи одатдагидан икки баробар ошиб кетган ҳолатлар ҳам аниқланган.
Вазирлик вакилининг огоҳлантиришича, қора рангли либослар нархини оширишга уринган сотувчилар 140 минг бат (тахминан 3 900 доллар) миқдорида жаримага тортилиши ёки етти йилгача озодликдан маҳрум этилиши мумкин.
Эслатиб ўтамиз, 68 йил давомида Таиландга қироллик қилган Пхумипон Адулядет 14 октябрь, жума куни вафот этди. У 88 ёшда эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)