Афғонистон вице-президенти генерал Абдурашид Дўстум «Толибон» жангарилари билан тўқнашув вақтида яраланди

Афғонистон вице-президенти генерал Абдурашид Дўстум «Толибон» ҳаракати жангарилари билан тўқнашув вақтида яраланди. Бу ҳақда Khaama Press агентлиги хабар бермоқда.

Anadolu агентлиги ахборотига кўра, Дўстумнинг конвойига Афғонистон шимолидаги Мозори-Шариф шаҳрида ҳужум уюштирилган. Ҳужум оқибатида 15 киши, хусусан, хавфсизлик кучлари ходимлари, шунингдек, генералга ҳамроҳлик қилаётган дала қўмондонлари ҳалок бўлган. 20 га яқин жангчи яраланган.

Дўстумнинг ўзи маълум қилишича, дастлаб «Толибон» жангарилари унинг кортежи Афғонистон шимолидаги Фарёб вилоятига кетаётган йўлда портлашни амалга оширган, шундан сўнг отишма бошланган. Генерал машиналарнинг бирида бўлган, у енгил жароҳат олган.

10 октябрь куни «Толибон» Ҳелманд вилояти маъмурий маркази — Лашкаргоҳ шаҳрига кенг миқёсли ҳужум бошлагани маълум бўлган эди. Улар шаҳар остонасига блокпостларга ҳужум қилган.

Бундан бир ҳафта аввал террорчилар Афғонистон шимолидаги Қундуз шаҳрига ҳужум қилган. Жангарилар тўрт йўналиш бўйича ҳукумат кучлари марраларига ҳужум қилиб, шаҳарга кириб борган.

1996—2001 йилларда «Толибон» вакиллари Афғонистонда ҳокимият тепасида бўлган. 2001 йил 11 сентябрь куни юз берган терактлардан АҚШ Афғонистонда ўтказган ҳарбий операция «Толибон» тузумининг ағдарилишига олиб келган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.