Олий Мажлис Қонунчилик палатаси депутатлари палатанинг навбатдаги ялпи мажлиси олдидан бир қатор қонун ва кодексларга ўзгартиш ва қўшимчалар киритиш тўғрисидаги қонун лойиҳаларини кўриб чиқмоқда. Бу ҳақда «Дарё»га палата матбуот хизмати маълум қилди.
Хусусан, Бюджет кодексида кўзда тутилган бюджет ва смета-штат интизоми, бюджет сўрови, рўйхатдан ўтказиш учун харажатлар сметалари ва штат жадваллари, шунингдек молиявий ҳисоботни тақдим этиш тартибини бузган ҳолларда жавобгарликка тортиш мақсадида Маъмурий жавобгарлик тўғрисидаги ҳамда Жиноят кодексининг тегишли моддаларига ўзгартиш ва қўшимчалар киритиш режалаштирилган.
— Мазкур қонуннинг қабул қилиниши бюджет ва смета-штат интизоми бузиш ҳуқуқбузарликларини квалификация қилиш борасидаги қарама-қаршиликларни бартараф этишни ва бир хилда талқин қилиш, бюджет тўғрисидаги қонун ҳужжатларини бузиш учун жавобгарликни тартибга солувчи тўлиқ ва якунланган қонунчилик ҳужжатини шакллантиришни таъминлайди, — дейди Қонунчилик ва суд-ҳуқуқ масалалари қўмитаси аъзоси Аваз Ўринбоев. — Шунингдек, амалиётдан келиб чиққан ҳолда бу ўзгартиришлар Бюджет кодексининг алоҳида нормалари, Маъмурий жавобгарлик тўғрисидаги Кодекс ва Жиноят кодексларининг тегишли нормалари ўртасидаги тафовутларни бартараф этади.
Ушбу қонун лойиҳаси фракциялар муҳокамасидан сўнг палатанинг навбатдаги ялпи мажлиси кун тартибига киритилади.
Изоҳ (0)