Германиянинг АҚШ божхона тўловларидан кўрадиган зарари йилига 31 миллиард еврогача етиши мумкин. Европанинг етакчи иқтисодиёти учун бундай хавфларни Deloitte маслаҳат компанияси башорат қилмоқда.
Мутахассисларнинг таъкидлашича, ўрта муддатли истиқболда Германиядан АҚШга товар экспорти 20 фоизга камаяди, бироқ бу йўқотишларни бошқа бозорларга, масалан, Европа Иттифоқининг бошқа мамлакатларига, Индонезия ёки Жанубий Кореяга етказиб беришни қайта йўналтириш орқали қоплаш мумкин. Шунда йўқотишларни 7,1 миллиард еврогача камайтириш имкони туғилади.
Бундан Германия машинасозлиги энг кўп зарар кўради. Унинг савдо тарифлари туфайли йўқотишлари тахминан 7,2 миллиард еврони ташкил этади. Германия фармацевтика компаниялари 5,1 миллиард евро йўқотади. Бундан ташқари, Германиянинг кимё, автомобилсозлик ва электротехника саноати ҳам зарар кўриши кутилмоқда.
Европа Иттифоқи ва АҚШ ўртасидаги келишув доирасида Европа товарларига тарифлар 15 фоизни ташкил этади, Америка товарлари учун эса улар нолга тенг бўлади. Шунингдек, Еврокомиссия Иттифоқ 750 миллиард долларлик энергия ташувчиларни сотиб олишини ва Америка иқтисодиётига тахминан 600 миллиард доллар сармоя киритишини ваъда қилган.
Германия пўлат ишлаб чиқарувчилар уюшмаси (Wirtschaftsvereinigung Stah) томонлар савдо можаросининг янада кучайишидан қочишга эришганликларини, аммо бунинг ўзи етарли эмаслигини ва келишув Европа пўлат саноатидаги оғир вазиятни ўзгартиришга қодир эмаслигини таъкидлаган. Германия канцлери Фридрих Мерс тарифларнинг ҳозирги 15 фоизлик даражаси келишув натижасида эришиш мумкин бўлган энг яхши натижа эканлигини билдирган.
12 июль куни Трамп АҚШ 1 августдан бошлаб Европа Иттифоқидан келтирилаётган маҳсулотларга 30 фоизлик бож солиқларини жорий этишини, шу билан бирга илгари киритилган соҳавий тарифлар ўз кучида қолишини маълум қилган эди. Унинг Европа Комиссияси раҳбарига йўллаган мактубида таъкидланишича, агар ЕИ Америка маҳсулотларига ўз тарифларини оширмоқчи бўлса, АҚШ ўзининг 30 фоизлик бож солиқларига “ушбу миқдорни” қўшиб қўяди.
Изоҳ (0)