Мадриднинг “Реал” клуби футболчилари яқин кунларда янги мавсумга тайёргарликни бошлайди. Goal нашрининг хабарига кўра, клубнинг янги ҳужумкор ярим ҳимоячиси Франко Мастантуоно дастлаб асосий жамоа билан машғулотларда иштирок эта олмайди.
Бунга сабаб — Испания қонунчилиги. Амалдаги қоидаларга кўра, Мастантуоно 18 ёшга тўлмагунча “Реал”нинг асосий таркиби билан расмий тарзда шуғулланиши мумкин эмас. Шу сабабли, у 14 августга қадар, яъни вояга етиш санасигача индивидуал машғулотлар олиб боради.
Эслатиб ўтамиз, Франко Мастантуоно “Реал Мадрид”га Аргентинанинг “Ривер Плейт” клубидан трансфер қилинган эди. Матбуот хабарларига кўра, “қироллик клуби” бу трансфер учун 45 миллион евро тўлаган.
Қайд этиш жоиз, июнь ойида Мастантуоно Аргентина миллий жамоасида дебют қилган ва жаҳон футболининг энг истиқболли ёш футболчиларидан бири сифатида эътироф этилмоқда.
Маълумот учун, футболчи ўтган мавсум “Ривер Плейт” сафида жами 22 та учрашувда майдонга тушиб, 7 та гол ва 4 та ассист муаллифи бўлган. Transfermarkt портали Франконинг бозор қийматини 30 миллион евро деб баҳолаган.
Изоҳ (0)