Расман. Аббосбек Файзуллаев — “Башакшеҳир” футболчиси (видео)

Туркиянинг “Истанбул Башакшеҳир” клуби Ўзбекистон терма жамоаси аъзоси Аббосбек Файзуллаев билан шартнома имзолаганини расман эълон қилди.

Клуб матбуот хизматининг маълум қилишича, истанбулликлар 21 ёшли ярим ҳимоячи билан беш йиллик шартнома имзолаган.

Ўзбекистон терма жамоаси футболчиси Аббосбек Файзуллаев билан беш йиллик шартнома имзоланди. У бунгача Россиянинг “ЦСКА” клубида тўп сурган. Ундан тўқ сариқ ва тўқ кўк либосда зафарли ўйинлар кутиб қоламиз, дейилади “Истанбул Башакшеҳир”нинг расмий баёнотида.

Туркия матбуоти хабарига кўра, трансфер қиймати 7 миллион еврони ташкил этган. Шунингдек, Файзуллаев истанбулликлар сафида 11-рақам остида ҳаракат қилади.

Маълумот учун, Файзуллаев 2023 йил августида Тошкентнинг “Пахтакор” клубидан Москванинг “ЦСКА” жамоасига 500 минг евро эвазига кўчиб ўтган эди. У Россия клуби сафида 72 та ўйин ўтказиб, ўз ҳисобига 8 та гол ва 22 та голли узатма ёздириб қўйган. Файзуллаев “ЦСКА” билан Россия Кубоги, Суперкубоги ва Премьер Лига бронза медалларини қўлга киритган. Шунингдек, 2023 йилда Осиёда “Йилнинг энг яхши ёш футболчиси” сифатида тан олинган.