Ўзбекистон Президенти сайловини ўтказувчи 3-Бухоро округ сайлов комиссиясининг мажлиси бўлиб ўтди
Ўзбекистон Республикаси Президенти сайловини ўтказувчи 3-Бухоро округ сайлов комиссиясининг мажлиси бўлиб ўтди, деб ёзади ЎзА.
Комиссия аъзолари ва оммавий ахборот воситалари ходимлари иштирок этган мажлисда округ ҳудудида сайлов участкалари тузиш тўғрисидаги масала муҳокама қилинди.
Мажлисда сайловлар мамлакатда ҳуқуқий демократик давлат ва кучли фуқаролик жамияти барпо этиш, иқтисодий тараққиёт ҳамда халқ келажагини белгилашда муҳим аҳамиятга эга экани, Ўзбекистон Республикаси Президенти сайловининг ошкоралик, тенглик ва адолат тамойиллари асосида ўтиши учун халқаро андазаларга мос мустаҳкам миллий қонунчилик асоси яратилгани таъкидланди.
– Бундай сиёсий тадбирларнинг ҳар жиҳатдан юқори савияда ташкил этилиши сайлов участкалари фаолияти самарали йўлга қўйилиши билан боғлиқ, – дейди 3-Бухоро округ сайлов комиссияси раиси М.Даминов. – «Ўзбекистон Республикаси Президенти сайлови тўғрисида»ги қонуннинг 10- ва 11- моддаларига мувофиқ, шаҳар, туман ҳокимликлари ва ҳарбий қисмлар командирларининг сайлов участкаларини тузиш тўғрисидаги тақдимномалари кўриб чиқилди. Шунга асосан, округ ҳудудида 500 сайлов участкаси тузилди ва уларнинг тартиб рақами, чегараси ва манзили кўрсатилган рўйхати тасдиқланди. Округ сайлов комиссиясининг бу ҳақдаги тегишли қарори матбуотда эълон қилинади.
Мажлисда сайлов участкаларида комиссия аъзоларининг тўлақонли фаолият юритиши учун тегишли шароитлар яратиш, жумладан, мебель жиҳозлари, компьютер, алоқа воситалари билан таъминлаш, она ва бола, тиббий хизмат хонасини жиҳозлаш масалалари ҳам муҳокама қилинди.
Ўзбекистон Республикаси Президенти сайловини ёритиш бўйича вилоят матбуот марказининг низоми, иш режасини тасдиқлаш, журналистларни аккредитациядан ўтказиш ва округ сайлов комиссияси ваколатига кирувчи бошқа тегишли масалалар бўйича қарорлар қабул қилинди. Оммавий ахборот воситалари ходимлари учун брифинг ташкил этилди.
