Ўзбекистонда долларнинг расмий курси 18 сўм 27 тийинга ошди

Ўзбекистон Марказий банки 2016 йил 4 октябрдан бошлаб валюта операциялари бўйича бухгалтерия ҳисоби, статистик ва бошқа ҳисоботларни юритиш, шунингдек, божхона ва бошқа мажбурий тўловлари учун хорижий валюталарнинг сўмга нисбатан янги қийматларини белгилади.

Унга кўра, 1 АҚШ доллари 3028 сўм 47 тийин этиб белгиланди. Бу 27 сентябрдаги курсга нисбатан 18 сўм 27 тийинга кўп.

Маълумот учун, АҚШ долларининг сўмга нисбатан расмий курси 2016 йил 5 январдан бери биринчи марта 7 сўмдан кўпроққа ошмоқда. Бунгача доллар курси 2016 йил 5 январдан бери ҳар ҳафта 4—7 сўм оралиғида ўсиб келаётган эди.

Эътиборли томони, 2015 йилда ҳам шунга ўхшаш ҳолат кузатилган эди: долларнинг сўмга нисбатан расмий курси январь—сентябрь ойлари давомида ҳар ҳафта 4—7 сўм оралиғида ўсиб борган, октябрь ойидан бошлаб эса ўсиш кўрсаткичи 14—15 сўм оралиғида бўлган.

2016 йил 4 октябрдан эътиборан 1 евро қиймати 3401 сўм 75 тийин (27 сентябрдаги курсга нисбатан 22 сўм 20 тийин арзон), 1 Хитой юани 454 сўм 15 тийин (27 сентябрдаги курсга нисбатан 2 сўм 83 тийин қиммат), 1 Россия рубли эса 47 сўм 77 тийин (27 сентябрдаги курсга нисбатан 64 тийин қиммат) этиб белгиланган.

Эслатиб ўтамиз, валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини олмаган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.