Москва шарқида тун бўйи пластмасса буюмлар омбори ёнди, деб ёзади «Ведомости». Фавқулодда вазиятлар вазирлиги маълумотларига кўра, саккиз нафар ўт ўчирувчи ҳалок бўлди, уларнинг жасадлари эрталаб, ёнғин тўхтатилганидан сўнг топилди.
Омбордаги фожиа 22 сентябрь, пайшанба куни кечқурун бошланди. Бинода пластикдан ясалган сунъий гуллар ва идиш-товоқлар сақланган. Иншоотдан юзга яқин ходимлар эвакуация қилинди.
Ёнғин ҳудуди 4000 квадрат метрга етди, 1500 квадрат метр майдонга эса бино томи қулаб тушди. Ёнғинга мураккабликнинг тўртинчи даражаси берилди.
Саккиз нафар ўт ўчирувчи билан тўсатдан алоқа йўқолган. Эрталаб ёнғин тўхтатилгач, йўқолганларни қидириш бошланган. Кейинроқ саккиз нафар марҳумнинг жасадлари топилган.
Саккиз нафар қутқарувчининг ўлими юзасидан жиноят иши қўзғатилди. Иш ёнғин хавфсизлиги талабларининг бузилиши ҳақидаги модда бўйича очилди. Ёнғин юзага келиши сабаблари бўйича техник, маиший ва бошқа версиялар бор.
Изоҳ (0)