Moskva sharqida tun bo‘yi plastmassa buyumlar ombori yondi, deb yozadi “Vedomosti”. Favqulodda vaziyatlar vazirligi ma’lumotlariga ko‘ra, sakkiz nafar o‘t o‘chiruvchi halok bo‘ldi, ularning jasadlari ertalab, yong‘in to‘xtatilganidan so‘ng topildi.
Ombordagi fojia 22-sentabr, payshanba kuni kechqurun boshlandi. Binoda plastikdan yasalgan sun’iy gullar va idish-tovoqlar saqlangan. Inshootdan yuzga yaqin xodimlar evakuatsiya qilindi.
Yong‘in hududi 4000 kvadrat metrga yetdi, 1500 kvadrat metr maydonga esa bino tomi qulab tushdi. Yong‘inga murakkablikning to‘rtinchi darajasi berildi.
Sakkiz nafar o‘t o‘chiruvchi bilan to‘satdan aloqa yo‘qolgan. Ertalab yong‘in to‘xtatilgach, yo‘qolganlarni qidirish boshlangan. Keyinroq sakkiz nafar marhumning jasadlari topilgan.
Sakkiz nafar qutqaruvchining o‘limi yuzasidan jinoyat ishi qo‘zg‘atildi. Ish yong‘in xavfsizligi talablarining buzilishi haqidagi modda bo‘yicha ochildi. Yong‘in yuzaga kelishi sabablari bo‘yicha texnik, maishiy va boshqa versiyalar bor.
Izoh (0)