Шавкат Мирзиёевнинг Ангренга сафари, «Юнусобод» метросининг қурилиши якунланадиган икки бекати, Тошкентда сотувга қўйилган 615 млн сўмлик Lamborghini ва куннинг бош муҳим янгиликлари

20 сентябрнинг эътиборга молик янгиликлари — «Дарё»нинг кечки дайжестида.

1. Шавкат Мирзиёев Ангренга ташриф буюрди. Ўзбекистон Президенти вазифасини бажарувчининг ташрифи доирасида бир қатор ташкилий масалалар ҳам кўриб чиқилган.

2. Бундан аввал Шавкат Мирзиёев Тошкент шаҳри туманларидаги бунёдкорлик ишлари билан танишган эди. Жумладан, «Новза» метро бекати олдида қурилаётган янги йўл ўтказгич қурилиши, Юнусобод ва Мирзо Улуғбек туманларини туташтирадиган янги йўл лойиҳалари билан. Бундан ташқари, мазкур танишув доирасида Мирзо Улуғбек тумани ҳокими ишдан олинди, шунингдек, шаҳардаги паспорт-виза режимига доир ишларни тизимли давом эттириш ҳақида кўрсатма берилди.

3. Шавкат Мирзиёев Тошкент метросининг «Юнусобод» йўналишидаги иккита бекатда қурилиш ишларини якунлаш юзасидан топшириқ берди. Гап айнан қайси бекатлар ҳақида бораётганига «Тошкент оқшоми» аниқлик киритмаган.

4. Ўзбекистон ва Қирғизистон чегаранинг 23 та ҳудудини текшириб чиқди. 14—20 сентябрь кунлари Жалолобод ва Ўшда Ўзбекистон ва Қирғизистон ҳукумат делегациялари ишчи гуруҳларининг ўзбек-қирғиз Давлат чегараларини делимитация ва демаркация қилиш масалалари бўйича учрашуви бўлиб ўтди.

5. 615 млн сўмлик Lamborghini Gallardo Андижон эмас, Тошкентда савдога қўйилгани маълум бўлди. Аукцион савдоси 22 сентябрь куни бўлиб ўтади.