Ўзбекистон Президенти вазифасини бажарувчи Шавкат Мирзиёев 18 сентябрь, якшанба куни Тошкент шаҳрининг бир қатор туманларида, хусусан, Юнусобод туманида бўлиб, бунёдкорлик ва ободонлаштириш ишлари билан бевосита танишди, дея хабар бермоқда «Тошкент оқшоми» газетаси.
Юнусобод туманидаги бунёдкорлик ва ободонлаштириш ишлари билан танишув давомида Ўзбекистон Биринчи Президенти Ислом Каримовнинг кўрсатмаларига биноан Тошкент метрополитени йўлларини замонавий йўлсозлик ва туннелсозлик технологияларини жорий этиш орқали давом эттириш ишларига алоҳида эътибор қаратилди.
«Хусусан, метронинг ‘Юнусобод’ йўналишидаги иккита бекатда қурилиш ишларини якунлаш, янги ер ости ва ер усти тезюрар метро йўналишлари қурилишини лойиҳалаштириш масалалари юзасидан тегишли вазирлик ва идоралар раҳбарларига топшириқлар берилди», — дейилади газета ахборотида. Гап айнан қайси бекатлар ҳақида бораётганига аниқлик киритилмаган.
Маълумот учун, Тошкент метрополитенининг «Юнусобод» йўли 2001 йили ишга туширилган бўлиб, ҳозирги вақтда олтита — «Шаҳристон», «Бодомзор», «Минор», «Абдулла Қодирий», «Юнус Ражабий» ва «Мингўрик» бекатларидан иборат, йўналишнинг узунлиги 6,4 километрни ташкил этади.
Тошкент метрополитени вагонларида йўловчилар эътиборига ҳавола қилинган расмий харитага кўра, «Юнусобод» йўналишида лойиҳавий номи «Файзулла Хўжаев», «Юнусобод», «Туркистон» бўлган станциялар қурилаётган бекатлар ҳисобланади.
Бундан ташқари, «Юнусобод» йўналишининг Тошкентнинг жанубий туманларини қамраб олувчи лойиҳалаштирилган бўлагида «Бобур», «Тўқимачи», «Усмон Носир», «Жанубий» каби бекатларнинг қурилиши кўзда тутилган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)