Ўзбекистон Президенти вазифасини бажарувчи Шавкат Мирзиёев 18 сентябрь, якшанба куни Юнусобод тумани ҳокимлигида Тошкент шаҳри ва туманлари ҳокимликлари, бошқа мутасадди идоралар раҳбарлари ва фаоллари иштирокида йиғилиш ўтказди. Бу ҳақда «Тошкент оқшоми» газетаси хабар бермоқда.
Хабар беришларича, иш фаолиятида мунтазам қолоқлик ва жиддий камчиликларга йўл қўйгани учун Мирзо Улуғбек тумани ҳокими Шомансур Аҳмедов ҳамда Ички ишлар бошқармаси бошлиғи Саидакбар Пўлатов эгаллаб турган лавозимидан озод этилди.
«Туманнинг бир қатор мутасадди идоралари раҳбарлари — прокурор Тимур Нормуҳаммедов, давлат солиқ инспекцияси раҳбари Абдурауф Каримов жиддий огоҳлантирилди», — дейилади «Тошкент оқшоми» ахборотида.
Газета ахборотида лавозимидан озод этилган мутасаддилар ўрнига кимлар тайинлангани ҳақида ахборот берилмаган. Тошкент шаҳар ҳокимлигининг тегишли саҳифасида ва Мирзо Улуғбек тумани ҳокимлиги сайтида ҳали ҳам Шомансур Аҳмедов туман ҳокими сифатида кўрсатилган.
Маълумот учун, мутахассислиги бўйича муҳандис-электрик бўлган Шомансур Аҳмедов (1966 йилда туғилган) туман ҳокими этиб тайинлангунига қадар Мирзо Улуғбек тумани ҳокимининг коммунал хўжаликни ривожлантириш, коммуникациялар ва ободонлаштириш масалалари бўйича биринчи ўринбосари (2012—2013 йилларда), «Тошшаҳарнур» давлат унитар корхонаси директорининг ўринбосари (2005—2006) ва биринчи ўринбосари (2006—2012) лавозимларида ишлаган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)