Террорчиларга нисбатан зарбаларни мувофиқлаштирувчи Россия-Америка ижроия маркази яқин кунлар ичида Женевада ишга тушади, дея хабар бермоқда «Интерфакс». Иккала мамлакат ҳарбий экспертлари биргаликдаги авиазарбалар қайси террорчилик гуруҳларига берилишини ўзаро келишиб олиши керак.
«Эришилган келишувларга кўра (9 сентябрдаги), марказ битимга эришилганидан бошлаб етти кун ичида ишга тушиши керак. Яъни, яқин кунларда Женевада, бизнинг ва америкалик шерикларимиз билан», — деди Россия ташқи ишлар вазири ўринбосари Геннадий Гатилов.
АҚШ давлат департаменти вакили Марк Тонернинг 9 сентябрдаги битимга кўра, Россия ва АҚШ ИШИДга эмас, фақат «Жабҳат ан-Нусра»га авиазарбалар беришга келишиб олгани ҳақидаги баёнотига изоҳ берар экан, Гатилов бу масала ҳали икки мамлакат ҳарбий экспертлари ўртасида келишиб олиниши кераклигини айтди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)