Шанхай ҳамкорлик ташкилоти Минтақавий аксилтеррор тузилмаси кенгаши (ШҲТ МАТК) террорчи-худкушлар ҳақидаги маълумотлар базасини шакллантиришга қарор қилди. Бу ҳақда «Коммерсантъ» хабар бермоқда.
Россия федерал хавфсизлик хизмати (ФХХ) директори биринчи ўринбосари Сергей Смирновнинг маълум қилишича, ушбу ташаббус Россиядан чиққан.
МАТК доирасида қидирув реестри ва терроризмга қаршилик кўрсатиш бўйича маълумотлар базаси мавжуд. Бугунги кунга келиб мазкур базада 2,5 минг киши ва 69 ташкилот ҳақида маълумотлар бор.
«Худкушлар истиқомат жойидан яширинган кишилар бўлиб, ҳеч ким уларнинг қаерда эканлиги, қайси ҳудудда эҳтимолий тайёргарликдан ўтаётганларини билмайди. Яшаш жойида узоқ вақт бўлмаётган кишиларга нисбатан аниқ чоралар кўрилади ва бу ҳам тузилманинг умумий реестри бўлади», — дея маълум қилди ФХХ директорининг биринчи ўринбосари.
Аввалроқ ШҲТ махсус хизматлари Қирғизистон пойтахти Бишкекдаги Хитой элчихонаси яқинида юз берган терактга келиб чиқиши Тожикистон, Хитой ва Россияга тақаладиган шахслар алоқадор эканлигини аниқлагани ҳақида хабар берилган эди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)