Россиядаги Далдикан дарёси қип-қизил тусга кириши сабаби маълум бўлди

Россиянинг «Норильский никель» тоғ-металлургия компанияси Красноярск ўлкасидаги Далдикан дарёсининг сентябрь бошида тўқ қизил тусга кириб қолгани сабабини тушунтирди, деб ёзади «РИА Новости». Бунга дарёга Надеженский металл заводи сув омборидан ифлосланган сувнинг оқиб кетиши сабаб бўлган.

Россия табиат вазирлиги сентябрь бошидаёқ Норильск аҳолиси шаҳардан оқиб ўтувчи Далдикан дарёси номаълум кимёвий реагент билан аномал тарзда ифлослангани ҳақида бир неча марта шикоят қилганини айтган эди. Бу дарёга сунъий қизил тус берди. Аммо, айбдор компаниянинг эгалари таъкидлашича, ушбу ҳодиса одамлар ва дарё фаунаси учун хавф туғдирмайди.

«Жорий йилда ‘Норникель’ гидрометаллургиянинг қазилма чиқиндилари қувурларини реконструкция қилди. Сентябрь бошида қувурнинг бир қисмини монтаж қилиш бўйича якуний ишлар олиб борилди. Қувурни кесишдан олдин уни бўшатишга қарор қилинди, бунинг учун фильтр дамбаларини тушириб, қолдиқлар оқиб кетишининг олди олинди. Шунга қарамай, бир неча кун жала ёғиши оқибатида улардан бири орқали сув оқиб тушди ва у Далдиканга бориб қуйилди», — деди табиат вазирлиги ходими.