АҚШ президентлигига Демократик партиядан номзод Ҳиллари Клинтон ўзини яхши ҳис қилаётгани ва аста-секин тузалаётганини маълум қилди, деб ёзади «РБК» зотилжам (пневмония) касаллигига чалинган собиқ давлат котибининг Twitter’ига таяниб.
«Соғайиб кетишни тилаганларнинг барчасига раҳмат! Мен ўзимни жуда яхши ҳис қилмоқдаман ва тузалмоқдаман», — деб ёзди Клинтон.
Сиёсатчи ишга қайтиб, сайловолди тадбирларда ўз тарафдорлари билан учрашувларга кириша олиши мумкин бўлган фурсатни пойлаётганини қўшиб қўйди. «Хасталик туфайли ишдан қолиб уйда ўтирган ҳар қандай киши каби мен ҳам ишга қайтишга ошиқмоқдаман», — деди у.
Эслатиб ўтамиз, Ҳиллари Клинтон 11 сентябрь терактларига бағишланган мотам маросимида ўзини нохуш ҳис этди ва Калифорния ҳамда Невадага сайловолди сафарларини бекор қилди.
Кейинроқ Клинтоннинг штаби жамоатчиликка унинг саломатлиги ҳақида хабар бермаслик қарори нотўғри бўлганини тан олди.
Изоҳ (0)