Сомон Йўлидаги 130 мингга яқин юлдузнинг рангига қараб, Нотр-Дам университети профессори Дэниела Каролло ва унинг ҳамкасблари уларнинг ҳар бирининг тахминий ёшини аниқлади, деб ёзади Naked Science. Сўнг улар маълумотларни ушбу юлдузларнинг коинотдаги жойлашуви харитасига киритди. Ҳосил бўлган тасвир, деб ёзади олимлар Nature Physics журналида, Галактикамиз иерархия тузилмасининг 13,5 миллиард йиллик шаклланиши билан мос тушади.
Иерархия моделига кўра, ғовли (Сомон Йўли каби) спирал галактика эволюцияси юлдузларнинг кичик тўдаси гравитация таъсири остида чанг билан қўшилганда ҳосил бўлади. Аммо илк авлодларнинг бир—иккита юлдузи пайдо бўлган анча кичик тўдалар эса галактика марказига қараб ҳаракатланади. Анча йирик ва оғирлари эса сиртқи қисмларда қолаверади, уларда юлдузлар пайдо бўлиши ва оғир элементлар тўпланиши давом этади.
Уч ўлчамли тасвирда Сомон Йўли юлдузлари ёши бўйича тақсимланган. Энг эскилари кўк ранг билан, янгилари эса қизил билан белгиланган, шунингдек, хаританинг ясси проекциялари ҳам кўрсатилган.
«Бундай харита орқали қайси юлдузлар биринчи бўлиб пайдо бўлганини аниқлашимиз, Галактиканинг турли қисмлари ёшига баҳо беришимиз мумкин, — деди Дэниела Каролло. — Энди биз Галактикамиз қандай шаклланганини кўришимиз, ўсиш давомида Галактика ютиб юборган ёки парчаланиб кетган анча майда юлдуз тўдалари изларини аниқлашимиз мумкин».
Изоҳ (0)