КХДРнинг шимолий ҳудудларидаги тошқин ва кўчкилар қурбонлар ҳамда салмоқли моддий зарарга олиб келди. Бу ҳақда Жанубий Кореянинг Free North Korea радиоси маълум қилди, дея хабар беради «ТАСС».
«Кучли ёмғирлар ва улар келтириб чиқарган кўчкилар Янгандо ва Хамген-Пукто провинцияларида вайрогарчиликларга сабаб бўлди. Жумладан, Хэсан шаҳрида беш қаватли уй қулаб тушди, унинг остида 80 нафаргача одам қолиб кетган бўлиши мумкин. Чондин шаҳрининг аксарият туманларида кўплаб турар-жой ва маъмурий бинолар сув остида қолди, қурбонлар бор. Офат Онсон ва Мусан шаҳарларида ҳам кишиларни ҳаётдан олиб кетди», — дейилади радионинг КХДРдаги манбаларга таяниб тарқатган хабарида.
Жанубий Корея миллий разведка хизмати мазкур маълумотни тасдиқлади ва ҳалок бўлганларнинг аниқ сони ҳамда етказилган моддий зиён миқдорини аниқлашга ҳаракат қилаётганини билдирди.
Изоҳ (0)