«Газпром» очиқ акциядорлик жамияти бошқарув раиси Алексей Миллер ҳамда Туркия энергетика ва табиий ресурслар вазири Берат Албайрак Истанбулдаги ишчи учрашувида «Туркия оқими» газ қувури лойиҳасини амалга ошириш бўйича келгуси қадамларни муҳокама қилди, деб ёзади «ТАСС».
«Учрашувда ‘Туркия оқими’ лойиҳасини амалга оширишни бошлаш учун зарур бўлган барча рухсатномаларни бериш жараёнини энг қисқа муддатларда якунлаш ҳақидаги битимга эришилди. Туркияга Россия газини етказиб бериш шартлари бўйича тижорат музокаралари давом эттирилади», — дейилади Россия газ холдинги тарқатган баёнотда.
Россия Евроиттифоқнинг талаби (газ қувури учинчи энергия пакетига мувофиқ бўлиши тўғрисидаги) туфайли «Жанубий оқим» лойиҳасини амалга оширишдан бош тортгач, «Туркия оқими»ни қуришга қарор қилинди. Аммо лойиҳа бўйича музокаралар икки томонлама алоқалардаги танглик туфайли тўхтатиб қўйилган эди.
Лойиҳа газ қувурини Қора денгиз орқали Туркиянинг Европадаги қисмигача, кейинчалик эса Греция билан чегарагача қуришни кўзда тутади.
Изоҳ (0)