Қозоғистон президенти йирик давлатлар муносабатларидаги тангликни бартараф этиш тизимини тузишни таклиф этди

Қозоғистон президенти Нурсултон Назарбоев йирик давлатлар ўртасидаги муносабатларда тангликни бартараф этиш тизимини тузиш ва ядро хавфсизлиги бўйича халқаро шартномалар юзасидан янги мажбуриятларни қабул қилишни таклиф этди. Бу ташаббусни у мамлакатда бўлиб ўтаётган «Ядро қуролисиз дунёни қуриш» халқаро анжумани чоғида билдирди, дея хабар беради «ТАСС». 

«Йирик давлатлар ўртасидаги муносабатларда тангликни бартараф этиш тизимини тузиш лозим. Шунингдек, одатий қурол-яроғ турлари ва янги ҳарбий технологияларни тарқатилиши юзасидан назоратни кучайтириш талаб этилади», — дея таъкидлади Назарбоев. 

Қозоғистон президенти барча мамлакатлар ҳукуматларини ядро хавфсизлиги учун асос бўлиб хизмат қилаётган халқаро шартномаларни мустаҳкамловчи янги мажбуриятларни қабул қилишга чақирди. «Мамлакатлари ва халқлари номидан иштирок этаётган барча парламент вакилларига бу борада фаол иштирок этишларини сўрайман», — дея мурожаат этди давлат раҳбари.