Россия президенти Владимир Путин томонидан Рио–2016 Олимпиадаси ғолибларига совға қилинган BMW X6 машинаси автомобилларни сотиш сайтида сотувга қўйилди, деб хабар бермоқда TJournal.
«Auto.ru» сайтида Катерина исми билан BMW X6 сотилишини эълон қилган фойдаланувчи президент совғаси учун 4 миллион 670 минг рубль сўраган. Эълонда автомобиль шахсан президент Владимир Путин томонидан Рио–2016 даги муваффақиятлар учун тақдим қилингани ҳақида айтилган ва машинанинг характеристикаси келтирилган.
«Р-Спорт» бош муҳаррири Василий Коновнинг маълум қилишича, Катерина машинанинг эгаси ҳисобланмайди. BMW X6 синхрон сузиш бўйича Олимпиада чемпионларидан бирига тегишли, аммо Конов спортчи қизнинг исмини ошкор этмади.
Бироз вақт ўтиб, сотувчи лотни сайтдан олиб ташлади ёки машина сотиб юборилди. Сотувчининг исм-шарифи фақат харидорга эълон қилинади.
Хабарда қайд этилишича, машина учун сўралганидан кўпроқ пул таклиф қилинган.
Изоҳ (0)