АҚШ астронавтларни Дональд Трампнинг президентлик муддати тугашидан олдин, яъни уч ярим йил ичида Ойга қўндиришни мўлжалламоқда. Бу ҳақда транспорт вазири, NASA директори вазифасини вақтинча бажарувчи Шон Даффи маълум қилди.
“Келаси йил биз Ойга қайтамиз, аммо қўнмаймиз, балки Ойни айланиб ўтамиз. Кейин тахминан бир йилдан сўнг яна Ойга қўнамиз. Бу Дональд Трамп давлат раҳбари лавозимини эгаллаб турган пайтда содир бўлади. Шундан сўнг база қурамиз, Ойда қоламиз ва у ерда олган билимларимиз Марсга етиб боришимизга ёрдам беради”, деди у Fox News телеканалига берган интервьюсида.
2019 йилнинг баҳорида NASA уч босқичли Artemis Ой дастури лойиҳасини эълон қилди. Биринчи босқич (Artemis I) Орион кемасининг Ой атрофида учувчисиз парвозини ва унинг Ерга қайтишини ўз ичига олган. Парвоз 2022 йил 16 ноябрдан 11 декабргача амалга оширилди. Иккинчи босқич (Artemis II) — кеманинг экипаж билан Ернинг табиий йўлдоши атрофида айланиб ўтиши. Учинчи босқичда (Artemis III) NASA астронавтларни Ойга қўндиришни ва кейинчалик Марсга юборишни режалаштирмоқда.
Дастлаб Artemis II ва Artemis III мос равишда 2022 ва 2024 йилларга мўлжалланган эди, бироқ бу муддатлар бир неча бор кечиктирилди. Ўтган йилнинг декабрь ойида NASA уларни 2026 йил апрель ва 2027 йил ўрталарига кўчирди.
Бундан аввал АҚШ Аэронавтика ва космик тадқиқотлар миллий бошқармаси (NASA) раҳбарияти ходимлар сони 3 870 кишига камайиб, тахминан, 14 минг кишига тушиши кутилаётгани ма`лум қилинганди.
Изоҳ (0)