АҚШнинг Техас ва Канзас штатлари орасида 2017 йил октябрда кузатилган 829 километр узунликдаги чақмоқ узунлик бўйича янги жаҳон рекордини ўрнатди. Бу ҳақда БМТ ҳузуридаги Жаҳон метеорология ташкилоти (ЖМТ) баёнотида маълум қилинди.
“ЖМТ энг узун чақмоқ бўйича янги жаҳон рекордини қайд этди. АҚШдаги машҳур бўронлар ҳудудида ҳайратланарли 829 километр (515 миля) узунликдаги чақмоқ кузатилди. Бу улкан чақмоқ 2017 йил октябрда кучли момақалдироқ пайтида содир бўлиб, шарқий Техасдан Канзас-Ситигача бўлган ҳудудни қамраб олган. Бу масофа Европадаги Париж билан Венеция орасидаги масофага тенг. Бундай масофани босиб ўтиш учун автомобилга тахминан саккиз-тўққиз соат, тижорат самолётига эса камида 90 дақиқа керак бўлади”, дейилади ҳужжатда.
Шунингдек, глобал экстремал ҳодисалар бўйича расмий маълумотларни юритувчи ЖМТнинг об-ҳаво ва иқлим экстремал ҳодисалари қўмитаси энг сўнгги сунъий йўлдош технологияларидан фойдаланиб, бу янги рекордни тасдиқлаган.
Ушбу чақмоқ аввалги рекорддан 61 километрга узунроқ. Олдинги рекорд 2020 йил 29 апрелда қайд этилган бўлиб, ўшанда чақмоқ АҚШ жанубидаги бир нечта ҳудудлардан ўтиб, 768 километр масофани босиб ўтган эди.
“Бу янги рекорд табиий офатнинг ақл бовар қилмас кучини яққол кўрсатади. Бундан ташқари, ЖМТнинг бундай рекорд сингари экстремал атроф-муҳит ҳодисаларини баҳолаши, бу каби ҳодисаларни кузатиш, ҳужжатлаштириш ва баҳолашда сезиларли илмий ютуқларга эришилганидан далолат беради. Эҳтимол, бундан-да жиддийроқ экстремал ҳодисалар мавжуд ва вақт ўтиши билан чақмоқларнинг бошқа юқори сифатли ўлчовлари тўпланиб боргани сари биз уларни кузатиш имконига эга бўламиз”, деб таъкидлайди ҳужжатда ЖМТнинг об-ҳаво ва экстремал иқлим ҳодисалари бўйича маърузачиси Рендалл Червеня.
Изоҳ (0)