Сунъий интеллект (СИ) тизими қўлда ташхис қўйишда эътибордан четда қолган тажовузкор ўсмаларнинг деярли учдан бир қисмини аниқлади. Гарвард университети олимлари шундай хулосага келишган. Тадқиқот натижалари Шимолий Америка Радиология Жамияти (RSNA) томонидан тақдим этилган.
Кўпгина мамлакатларда аёллар кўкрак бези саратонини эрта аниқлаш учун мунтазам равишда маммографиядан ўтадилар. Бироқ текширишлар орасидаги даврда пайдо бўладиган ўсмалар ҳаммадан кўра хавфлироқдир. Улар тез ўсади, кўпинча атипик шаклга эга ва зич тўқималар орқасида яширинган бўлиши мумкин, шунинг учун уларни икки ўлчовли рентген тасвирларида аниқлаш қийин.
Сунъий интеллектнинг самарадорлигини текшириш учун тадқиқотчилар 1,4 мингга яқин томографик тасвирларни, шу жумладан шифокорлар эътибор бермаган 224 та ўсимтани таҳлил қилишган. Сунъий интеллект уларнинг 73 тасини тўғри аниқлаган - бу барча ўтказиб юборилган ташхисларнинг 32 фоизини ташкил этади.
Гарвард университети доценти Маниша Балнинг айтишича, сунъий интеллект нафақат яширин ўсмаларни аниқлаган, балки уларнинг чегараларини ҳам аниқ белгилаб берган.
“Бу сунъий интеллектнинг кўкрак бези саратонини ташхислашда иккинчи фикр воситаси сифатидаги салоҳиятини таъкидлайди”, деди у.
Тадқиқот муаллифларининг фикрича, сунъий интеллектни маммография процедураларига интеграциялаш нафақат диагностика аниқлигини ошириши, балки самарадорликни сақлаб қолган ҳолда текширувлар сонини камайтириши мумкин. Бу, айниқса, беморлар ҳаётига энг катта хавф туғдирадиган саратоннинг тажовузкор шаклларини ўз вақтида аниқлаш учун муҳимдир.
Изоҳ (0)