Ливия миллий келишув ҳукуматига содиқ қўшинлар 21 август, якшанба куни ИШИД жангарилари отрядлари қолаётган Сиртдаги ҳужум операцияларини давом эттирди, деб ёзади «ТАСС» армия расмий вакилига таяниб.
Қўшин бўлинмалари артиллерия ва танклар ёрдамида шаҳарда ИШИД раҳбарлари ваъзхонлик қилган энг йирик масжидни ҳамда қамоқхона биносини озод этишга муваффақ бўлди. Операция чоғида ҳукумат кучларининг саккиз жангчиси ҳалок бўлди, яна 85 нафари яраланди.
Ҳарбийлар сўзларига кўра, Сиртнинг катта қисми миллий келишув ҳукумати отрядлари қўлига ўтиб бўлган. Шу ой аввалида улар террорчилардан штаб сифатида қўлланилган «Уагадугу» анжуманлар маркази, касалхона, қатор йирик банклар бинолари, маҳаллий университет шаҳарчаси, бир нечта йирик турар-жой даҳаларини қайтариб олган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)