Ҳиндистонлик ҳуқуқ ҳимоячиси Иром Шармила 16 йил давом этган очлик акциясига якун ясади. Бу дунёдаги энг узоқ давом этган очлик бўлди. Шармила Манипур штати парламент сайловларидаги иштироки боис очликни тўхтатди. Бу ҳақда, AFP’га асосланиб, TJournal хабар бермоқда.
Шармила 2000 йилнинг ноябрь ойида очлик эълон қилган эди. Бунга Манипур штатида Ассам Рифлес бўлинмасига мансуб давлат ҳарбий хизматчилари гуруҳи жамоат транспорти бекатида ўн нафар тинч фуқарони ўлдиргани сабаб бўлган эди. Унинг фикрича, маҳаллий қуролли кучлар инсон ҳуқуқларини кўп бузади, аммо бунинг учун жавобгарликка тортилмайди.
Очлик эълон қилингач, аёл ўз жонига қасд қилишда айбланди — Ҳиндистонда бу жиноят ҳисобланади. Шармила бир неча йил ҳибсда ўтирди, бу давр мобайнида у кунига икки маҳал бурнидаги найча орқали мажбурлаб овқатлантирилди. Очлик тугади, эндиликда Шармила мустақил равишда овқатлана бошлаши учун унга шифокорлар ёрдами керак бўлади.
Суд инсон ҳуқуқлари фаолини 10 минг рупия (150 доллар) гаров пули эвазига озодликка чиқарди. Шунингдек, суд ундан очлик тўхтатилгани ҳақида ёзма тушунтириш хати талаб қилди.
Иром Шармила очлик тизимни ўзгартиришнинг энг яхши йўли эмаслигини тушунганини, шу боис сиёсат орқали адолат йўлида курашишга қарор қилганини айтди.
«Қарийб 16 йил муқаддам очликни бошлар эканман, тизимни ўзгартира оламан деб ўйлаган эдим, лекин ҳозир мен бу ҳеч қандай натижа бермаслигини тушунаман. Шу боис мен вазифамни бажариш — адолатга эришиш учун очликни тўхтатиб, сиёсатга киришга қарор қилдим», — деди аёл.
Жаҳон матбуоти Шармилани «Темир хоним» деб атайди. У инсон ҳуқуқлари ҳимояси соҳасида бир қанча халқаро мукофотларга сазовор бўлди.
Изоҳ (0)