Hindistonlik huquq himoyachisi Irom Sharmila 16 yil davom etgan ochlik aksiyasiga yakun yasadi. Bu dunyodagi eng uzoq davom etgan ochlik bo‘ldi. Sharmila Manipur shtati parlament saylovlaridagi ishtiroki bois ochlikni to‘xtatdi. Bu haqda, AFP’ga asoslanib, TJournal xabar bermoqda.
Sharmila 2000-yilning noyabr oyida ochlik e’lon qilgan edi. Bunga Manipur shtatida Assam Rifles bo‘linmasiga mansub davlat harbiy xizmatchilari guruhi jamoat transporti bekatida o‘n nafar tinch fuqaroni o‘ldirgani sabab bo‘lgan edi. Uning fikricha, mahalliy qurolli kuchlar inson huquqlarini ko‘p buzadi, ammo buning uchun javobgarlikka tortilmaydi.
Ochlik e’lon qilingach, ayol o‘z joniga qasd qilishda ayblandi — Hindistonda bu jinoyat hisoblanadi. Sharmila bir necha yil hibsda o‘tirdi, bu davr mobaynida u kuniga ikki mahal burnidagi naycha orqali majburlab ovqatlantirildi. Ochlik tugadi, endilikda Sharmila mustaqil ravishda ovqatlana boshlashi uchun unga shifokorlar yordami kerak bo‘ladi.
Sud inson huquqlari faolini 10 ming rupiya (150 dollar) garov puli evaziga ozodlikka chiqardi. Shuningdek, sud undan ochlik to‘xtatilgani haqida yozma tushuntirish xati talab qildi.
Irom Sharmila ochlik tizimni o‘zgartirishning eng yaxshi yo‘li emasligini tushunganini, shu bois siyosat orqali adolat yo‘lida kurashishga qaror qilganini aytdi.
“Qariyb 16 yil muqaddam ochlikni boshlar ekanman, tizimni o‘zgartira olaman deb o‘ylagan edim, lekin hozir men bu hech qanday natija bermasligini tushunaman. Shu bois men vazifamni bajarish — adolatga erishish uchun ochlikni to‘xtatib, siyosatga kirishga qaror qildim”, — dedi ayol.
Jahon matbuoti Sharmilani “Temir xonim” deb ataydi. U inson huquqlari himoyasi sohasida bir qancha xalqaro mukofotlarga sazovor bo‘ldi.
Izoh (0)