Россиянинг Пермь вилоятида шифокорлар 23 ёшли қизни клиник ўлимдан қарийб тўққиз дақиқа ўтиб, ҳаётга қайтаришга ва тиниқ онгини қайта тиклашга муваффақ бўлди, деб ёзади TJournal.

Таъкидлаш жоиз, тиббий дарсликларда қайд этилишича ҳамда шифокорлар ҳисоб-китобларига кўра, «ўлишни ортга қайтариш мумкин бўлган босқич» 5—7 дақиқадан узоқ давом этмайди.

Қиз «йиқилиб тушиб, нафас олмай қўйган» ҳолатда тез ёрдам чақиришади. Етиб келган шифокорлар унда клиник ўлимни қайд этиб, у 8,5 дақиқа давом этганини аниқлайди. Тез ёрдам бригадаси жонлантириш тадбирларини олиб боради ва қизни шаҳар стационарига етказади. Унинг юрак фаолиятини тиклай олишади, аммо бемор ҳушига келмайди ва чуқур комага тушиб қолади.

Бироз вақтдан сўнг бемор қиз билан неврологлар, реабилитологлар, кинезитерапевтлар (даволовчи жисмоний машқлар билан шуғуллантиради), психологлар, логопедлар ишлаб, асаб тизими, сезги органлари фаолиятини яхшилаш учун комплекс терапия олиб борди, унга ютинишни, гапиришни қайтадан ўргатишди. Иккинчи ҳафтадаёқ қизда яхши томонга ўзгаришлар қайд этилди.

Ҳозирча қизда хотираси билан боғлиқ муаммолар бор — у 18 ёшидан кейинги воқеаларни эслай олмайди.