Nissan Motor компанияси дунёда биринчи қаттиқ оксидли ёқилғи элементларига эга (SOFC) автомобилни тақдим этди. E-Bio Fuel-Cell номини олган лойиҳа учун асос сифатида Nissan e-NV200 электр фургони хизмат қилди, деб хабар беради «Драйв».
Фото: «Драйв»
Ишлаб чиқарувчи июнда мазкур технология билан боғлиқ тажрибалар ҳақида маълум қилганди, ҳозирда эса илк нусха йўл синовлари учун тайёр. Автомобилда ёқилғи учун тоза этанол ёки сув аралаш спиртдан фойдаланилади. Шу сабаб биоэтанол кўп ишлаб чиқариладиган Бразилия синов учун танланди.
Тажриба нусхасида SOFC ячейкалари 5 киловатт қувватга эга ва сиғими 24 кВт/соатли батареяни тўйинтиради. Спирт учун 30 литрли бак ва литийли батарея машинага 600 километр йўл юришга имкон беради.
Nissan Motor президенти Карлос Гонга кўра, спирт ёқилғисида юрадиган электромобиль энергетика ва ёқилғи бозорини минтақавий ривожланишини қўллаб-қувватлашга қодир, у инфраструктура ўзгартирилишини талаб этмайди, бошқа ёқилғи турларига нисбатан фойдаланишда хавфсиз. Мазкур технология 2020 йилда бозорга чиқиши кутилмоқда.
Изоҳ (0)